നിര്‍മ്മാണോദ്ഘാടനം മന്ത്രി ഡോ. ആര്‍. ബിന്ദു നിര്‍വഹിച്ചു
ഇരിങ്ങാലക്കുട ഗവ. മോഡല്‍ ഗേള്‍സ് ഹൈസ്‌കൂളിന്റെയും വി.എച്ച്.എസ്.ഇ യുടെയും പുതിയ കെട്ടിടങ്ങളുടെ നിര്‍മ്മാണോദ്ഘാടനം ഉന്നത വിദ്യാഭ്യാസ, സാമൂഹിക നീതി വകുപ്പ് മന്ത്രി ഡോ. ആര്‍. ബിന്ദു നിര്‍വഹിച്ചു. എല്ലാ കുട്ടികള്‍ക്കും മികച്ച വിദ്യാഭ്യാസം ഒരുക്കണമെന്ന് സര്‍ക്കാരിന്റെ ലക്ഷ്യത്തോടെ സൗന്ദര്യവും സൗകര്യവും ഒത്തിണങ്ങിയ വിദ്യാലയമായി മാറുകയാണ് ഇരിങ്ങാലക്കുട ഗേള്‍സ് സ്‌കൂളെന്ന് മന്ത്രി പറഞ്ഞു. അധ്യാപകരുടെ ഏറ്റവും പ്രധാനപ്പെട്ട ഉത്തരവാദിത്വം വിദ്യാര്‍ത്ഥികളുടെ സര്‍ഗ്ഗവാസനയ്ക്കും കഴിവുകള്‍ക്കും പ്രചോദനം നല്‍കി കൂടെ നില്‍ക്കുക എന്നതാണ്. സമൂഹം അഭിമുഖീകരിക്കുന്ന പ്രശ്‌നങ്ങള്‍ക്ക് പരിഹാരം നിര്‍ദ്ദേശിക്കാന്‍ കഴിയുന്ന പ്രതിഭാശാലികളായി വിദ്യാര്‍ത്ഥികള്‍ മാറണമെന്നും മന്ത്രി കൂട്ടിച്ചേര്‍ത്തു.
സംസ്ഥാന സര്‍ക്കാരിന്റെ പ്ലാന്‍ ഫണ്ടില്‍ നിന്ന് രണ്ടുകോടി രൂപ വിനിയോഗിച്ചാണ് ഇരിങ്ങാലക്കുട ഗവ. ഗേള്‍സ് ഹൈസ്‌കൂളിന് പുതിയ കെട്ടിടം നിര്‍മ്മിക്കുന്നത്. കിഫ്ബി പദ്ധതിയില്‍ ഒരുകോടി 30 ലക്ഷം രൂപ വിനിയോഗിച്ചാണ് വി.എച്ച്.എസ്.ഇ ബ്ലോക്കിന്റെ മൂന്നാമത്തെ നില നിര്‍മ്മിക്കുന്നത്. ചടങ്ങില്‍ ഇരിങ്ങാലക്കുട നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. പി.ഡബ്ല്യു.ഡി അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ നിമേഷ്, ഇരിങ്ങാലക്കുട മുന്‍സിപ്പാലിറ്റി അസിസ്റ്റന്റ് എഞ്ചിനീയര്‍ ബിനു, സ്റ്റാന്‍ഡിംഗ് കമ്മിറ്റി ചെയര്‍പേഴ്‌സന്‍മാരായ അഡ്വ. ജിഷ ജോബി, അംബിക പള്ളിപ്പുറത്ത്, വിദ്യാകിരണം ജില്ലാ കോര്‍ഡിനേറ്റര്‍ എന്‍.കെ രമേഷ്, വി.എച്ച്.എസ്.ഇ വിഭാഗം പ്രിന്‍സിപ്പാള്‍ കെ.ആര്‍ ഹേന, എച്ച്.എസ്.എസ് വിഭാഗം പ്രിന്‍സിപ്പാള്‍ ബിന്ദു പി. ജോണ്‍, ഹെഡ്മിസ്ട്രസ് കെ.എസ് സുഷ, എല്‍.പി വിഭാഗം ഹെഡ്മിസ്ട്രസ് പി.എം അസീന, പി.ടി.എ പ്രസിഡന്റ് പി.കെ അനില്‍കുമാര്‍, എസ്.എം.സി ചെയര്‍മാന്‍ എ.വി ഷൈന്‍, ഒ.എസ്.എ പ്രതിനിധി അംബിക മുരളി തുടങ്ങിയവര്‍ പങ്കെടുത്തു.
