കരുവന്നൂര്‍ സഹകരണ ബാങ്ക് തട്ടിപ്പില്‍ സിപിഎം സംസ്ഥാന സമിതി അംഗവും എംഎല്‍എയുമായ എ.സി.മൊയ്തീന് ഇഡി നോട്ടീസ്. ഈ മാസം 31ന് ചോദ്യം ചെയ്യലിന് ഹാജരാകാനാണ് നിര്‍ദേശം.
കരുവന്നൂര്‍ സഹകരണ ബാങ്ക് തട്ടിപ്പില്‍ സിപിഎം സംസ്ഥാന സമിതി അംഗവും എംഎല്‍എയുമായ എ.സി.മൊയ്തീന് ഇഡി നോട്ടീസ്. ഈ മാസം 31ന് ചോദ്യം ചെയ്യലിന് ഹാജരാകാനാണ് നിര്‍ദേശം. രാവിലെ 11ന് കൊച്ചി ഓഫീസിലാണ് ഹാജരാകേണ്ടത്. കോടികളുടെ ബെനാമി ലോണുകള്‍ പലതും അനുവദിച്ചത് മോയ്തീന്‍റെ നിര്‍ദേശപ്രകാരമാണെന്ന് ഇഡി വ്യാഴാഴ്ച വാര്‍ത്താക്കുറിപ്പില്‍ അറിയിച്ചിരുന്നു.
ഈ ശിപാര്‍ശയ്ക്ക് മൊയ്തീന് സാമ്പത്തിക നേട്ടം ഉണ്ടായിട്ടുണ്ടോ എന്നതടക്കം പരിശോധിക്കും. കേസിലെ പ്രതിയും ബാങ്കിന്റെ മുന്‍ മാനേജരുമായ ബിജു കരീമുമായി നടന്ന വാട്‌സ്ആപ്പ് ചാറ്റുകള്‍ ഇഡിയുടെ കൈവശമുണ്ട്. ഇതടക്കമുള്ള ഫോണ്‍ രേഖകളുടെ അടിസ്ഥാനത്തിലാകും ചോദ്യം ചെയ്യല്‍
ബാങ്കിന്റെ അംഗങ്ങള്‍ അല്ലാത്തവര്‍ക്കാണ് ലോണുകള്‍ അനുവദിച്ചതെന്ന് ഇഡി കണ്ടെത്തിയിരുന്നു. പാവപ്പെട്ടവരുടെ ഭൂമി അവരറിയാതെ പണയപ്പെടുത്തിയാണ് ഇത്തരത്തില്‍ വായ്പ നല്‍കിയത്. 150 കോടി രൂപയുടെ തട്ടിപ്പ് നടന്നത് സിപിഎം ജില്ലാ കമ്മിറ്റി അംഗങ്ങള്‍ അടക്കമുള്ളവരുടെ അറിവോടെയാണ്.
മൊയ്തീന്‍റെ വീട്ടിലടക്കം ആറിടങ്ങളില്‍ കഴിഞ്ഞ ദിവസം ഇഡി റെയ്ഡ് നടത്തിയിരുന്നു. റെയ്ഡിനിടെ 36 ഇടങ്ങളിലായുള്ള സ്വത്തുക്കളുടെ രേഖകള്‍ കണ്ടെത്തി. ഇതനുസരിച്ച് 15 കോടിയോളം രൂപയുടെ സ്വത്തുക്കള്‍ കണ്ടുകെട്ടിയെന്നും ഇഡി വ്യക്തമാക്കിയിരുന്നു. മൊയ്തീന്‍റെയും ഭാര്യയുടെയും പേരിലുള്ള 28 ലക്ഷത്തിന്‍റെ ബാങ്ക് അക്കൗണ്ടുകള്‍ മരവിപ്പിച്ചതായും ഇഡി അറിയിച്ചിരുന്നു.
