കൊണ്ടാഴി ഗ്രാമപഞ്ചായത്തിലെ കുഴിയംപാടം തെക്കേ കൊണ്ടാഴി നീർത്തടം ആസ്തി കൈമാറ്റവും കർഷകർക്കായുള്ള ഏകദിന പരിശീലന പരിപാടിയും യു ആർ പ്രദീപ് എം എൽ എ ഉദ്ഘാടനം ചെയ്തു. പ്രതിസന്ധികൾ നേരിടുന്ന കാർഷിക മേഖലയെ സംരക്ഷിക്കാൻ കേന്ദ്രപദ്ധതികളും നിയമനിർമ്മാണവും ആവശ്യമാണെന്ന് എംഎൽഎ പറഞ്ഞു. നബാർഡിൻ്റെ സാമ്പത്തിക സഹായത്തോടെ ഗ്രാമീണ അടിസ്ഥാനസൗകര്യ വികസനനിധി ഇരുപത്തിയഞ്ചാമത് വായ്പാഭാഗമായി 77.99 ലക്ഷം രൂപ ചെലവിലാണ് പദ്ധതി നടപ്പിലാക്കി കൈമാറിയത്.
നീർത്തട പദ്ധതിയുടെ ഭാഗമായി കൊണ്ടാഴി ഗ്രാമ പഞ്ചായത്തിലെ 5, 6, 7, 11,12 വാർഡുകൾ ഉൾപ്പെടുന്നതാണ് കുഴിയംപാടം തെക്കേ കൊണ്ടാഴി നീർത്തടം പദ്ധതി. 2014.41 ഏക്കറോളം വരുന്ന സ്ഥലത്ത് മഴക്കുഴികൾ, വൃക്ഷത്തൈ നടീൽ, കിണർ റീചാർജ്, ഫലവൃക്ഷത്തൈ വിതരണം, കുളക്കാട്ട് കുളം നവീകരണം, പാർശ്വഭിത്തി സംരക്ഷണം, തെങ്ങിൻ്റെ തടം തുറക്കൽ, എന്നീ പ്രവർത്തനങ്ങൾ പദ്ധതിയുടെ ഭാഗമായി നടപ്പിലാക്കി. പ്രദേശത്തെ 1200 ഓളം വരുന്ന കർഷകർക്ക് ഗുണം ലഭിച്ച പദ്ധതി വഴി ഭൂഗർഭ ജലവിതാനം ഉയർത്താനും കുടിവെള്ളക്ഷാമം പരിഹരിക്കുന്നതിനും കഴിഞ്ഞു.
ഏകദിന പരിശീലന പരിപാടിയുടെ ഭാഗമായി കാർഷിക മണ്ണ് സംരക്ഷണ വിഷയങ്ങളുമായി ബന്ധപ്പെട്ട് വെള്ളാനിക്കര കാർഷിക കോളേജ് ഡീൻ ഡോ. സി ജോർജ് തോമസ്, സോയിൽ സർവേ അസിസ്റ്റൻ്റ് ഡയറക്ടർ ധന്യ എൻ എം എന്നിവർ ക്ലാസുകൾ നയിച്ചു. ജില്ലാ മണ്ണ് സംരക്ഷണ ഓഫിസർ ബിന്ദു മേനോൻ പദ്ധതി വിശദീകരണം നടത്തി.
ഗ്രാമപഞ്ചായത്ത് പ്രസിഡൻ്റ് കെ ശശിധരൻ ചടങ്ങിൽ അധ്യക്ഷനായ ചടങ്ങിൽ പഴയന്നൂർ ബ്ലോക്ക് പഞ്ചായത്ത് വൈസ് പ്രസിഡൻ്റ് പ്രശാന്തി പി മുഖ്യാതിഥിയായി. വൈസ് പ്രസിഡൻ്റ് ലതാ നാരായണൻകുട്ടി, സ്റ്റാൻഡിംഗ് കമ്മിറ്റി അംഗങ്ങളായ നിഷമോൾ വി, ബിജു തടത്തിവിള, പ്രിയംവദ കെ. കെ., പി എം അനീഷ്, ശിവദാസൻ വി പി, ബിജു വി കെ, ശിവൻ വീട്ടിക്കുന്ന്, പഞ്ചായത്ത് സെക്രട്ടറി രോഹിണി എം എസ്, കൃഷി ഓഫീസർ ശ്രീലക്ഷ്മി കെ. ബി. എന്നിവർ ആശംസകൾ നേർന്നു. മണ്ണ് സംരക്ഷണ ഓഫിസർ ബിന്ദു മേനോൻ സ്വാഗതം ആശംസിച്ച ചടങ്ങിൽ നീർത്തട കമ്മിറ്റി കൺവീനർ സിദ്ധാർത്ഥൻ കെ. നന്ദി പറഞ്ഞു.
