കയ്പമംഗലം പോലീസ് ചാർജ്ജ് ചെയ്‌ത കേസ്സിൽ പ്രതിയായ കയ്പമംഗലം സ്വദേശി 55 വയസ്സ്, കുട്ടനെതിരെയാണ് കോടതി ശിക്ഷാവിധി പ്രഖ്യാപിച്ചത്.
ഇരിഞ്ഞാലക്കുട : പ്രായപൂർത്തിയാകാത്ത അതിജിവിതക്കെതിരെ ലൈംഗിക അതിക്രമം നടത്തിയ കേസ്സിൽ പ്രതിക്ക് 32 വർഷം തടവും 1,40,000/ രൂപ പിഴയും ശിക്ഷ വിധിച്ചുകൊണ്ട് ഇരിഞ്ഞാലക്കുട അതിവേഗ സ്പെഷ്യൽ കോടതി ജഡ്‌ജ്’ രവിചന്ദർ സി. ആർ. വിധി പ്രസ്‌താവിച്ചു.
2017 സെപ്റ്റംബർ മുതൽ 2018 വരെയുള്ള കാലയളവിൽ പ്രായപൂർത്തിയാകാത്ത അതിജീവിതക്കെതിരെ ലൈംഗികാതിക്രമം നടത്തിയെന്നാരോപിച്ച് കയ്പമംഗലം പോലീസ് ചാർജ്ജ് ചെയ്‌ത കേസ്സിൽ പ്രതിയായ കയ്പമംഗലം സ്വദേശി 55 വയസ്സ്, കുട്ടനെതിരെയാണ് കോടതി ശിക്ഷാവിധി പ്രഖ്യാപിച്ചത്. പ്രോസിക്യൂഷൻ ഭാഗത്തുനിന്നും 15 സാക്ഷികളേയും 26 രേഖകളും പ്രതിഭാഗത്തുനിന്നും 1 രേഖയും തെളിവുകളായി നൽകിയിരുന്നു. കയ്പമംഗലം പോലീസ് സബ്ബ് ഇൻസ്പെക്‌ടർ ആയിരുന്ന അനൂപ് പി. ജി. രജിസ്റ്റർ ചെയ്‌ത കേസ്സിൽ ഇൻസ്പെക്‌ടർ ആയിരുന്ന ജയേഷ് ബാലനാണ് അന്വേഷണം നടത്തിയത്. കയ്പമംഗലം ഇൻസ്പെക്‌ടർ ആയിരുന്ന കെ. എസ്. സുബിന്ത് ആണ് കുറ്റപത്രം സമർപ്പിച്ചത്. പ്രോസിക്യൂഷനുവേണ്ടി സ്പെഷ്യൽ പബ്ലിക് പ്രോസിക്യൂട്ടർ അഡ്വ. വിജു വാഴക്കാല ഹാജരായി. സീനിയർ സിവിൽ പോലീസ് ഓഫീസർ ടി. ആർ. രജിനി പ്രോസിക്യൂഷൻ നടപടികൾ ഏകോപിപ്പിച്ചു.
പോക്സോ നിയമത്തിൻ്റെ 6-ാം വകുപ്പ് പ്രകാരം 10 വർഷം കഠിനതടവും 50,000/- രൂപ പിഴയും പിഴയൊടുക്കാതിരുന്നാൽ 6 മാസം വെറും തടവും പോക്സോ നിയമത്തിൻ്റെ 10-ാം വകുപ്പ് പ്രകാരം 5 വർഷം വെറും തടവും 25,000/- രൂപ പിഴയും പിഴയൊടുക്കാതിരുന്നാൽ 3 മാസം വെറും തടവും 12-ാം വകുപ്പ് പ്രകാരം 6 വർഷം വെറും തടവും 20,000/- രൂപ പിഴയും പിഴയൊടുക്കാതിരുന്നാൽ 2 മാസം വെറും തടവും കൂടാതെ ഇന്ത്യൻ ശിക്ഷാനിയമം വിവിധ വകുപ്പുകളിലായി 11 വർഷം കഠിന തടവും ഒരു മാസം വെറും തടവും 45,000/- രൂപ പിഴയും പിഴയൊടുക്കാതിരുന്നാൽ 5 മാസം വെറും തടവിനുമാണ് ശിക്ഷിച്ചത്. പ്രതിയെ വിയ്യൂർ ജയിലിലേക്ക് റിമാൻഡ് ചെയ്‌തു.പിഴ സംഖ്യ ഈടാക്കിയാൽ ആയത് അതിജീവിതക്ക് നഷ്ട‌പരിഹാരമായി നൽകുവാനും ഉത്തരവിൽ നിർദ്ദേശമുണ്ട്.
