ലോക സീറോ വേസ്റ്റ് ദിനത്തിൻ്റെ പ്രചരണാർത്ഥം മുരിയാട് ഗ്രാമപഞ്ചായത്ത് നടപ്പിലാക്കുന്ന ക്ലീൻ ഗ്രീൻ മുരിയാട് പദ്ധതിയുടെ സന്ദേശവുമായി ശുചിത്വ വിളംബര യാത്ര നടന്നു. മുരിയാട് ഗ്രാമപഞ്ചായത്ത് പ്രസിഡന്റ് ജോസ് ജെ ചിറ്റിലപ്പിള്ളിയുടെ നേതൃത്വത്തിലാണ് ക്ലീൻ ഗ്രീൻ മുരിയാട് ശുചിത്വ വിളംബര യാത്ര സംഘടിപ്പിച്ചത്. പുല്ലൂർ ഉരിയരിചിറ പരിസരത്ത് നിന്ന് ആരംഭിച്ച പര്യടനം ജില്ലാ പഞ്ചായത്ത് വൈസ് പ്രസിഡന്റ് ലതാ ചന്ദ്രൻ ഉദ്ഘാടനം ചെയ്തു.
17 വാർഡുകളിലും ശുചിത്വ സഭ പൂർത്തിയാക്കിയിട്ടുണ്ട്. വാർഡ് തല ശുചീകരണയജ്ഞത്തിനു പുറമേ ക്ലീൻഗ്രീൻശുചിത്വ സുന്ദര തെരുവുകൾ രൂപപ്പെടുത്തിയും പരിശോധനകൾ കർശനമാക്കിയുമാണ് ക്ലീൻ ഗ്രീൻ പരിപാടി മുന്നേറുന്നത്. മാർച്ച് 30 ന് മുൻപായി സമ്പൂർണ്ണ ശുചിത്വ പഞ്ചായത്തായി മുരിയാട് ഗ്രാമപഞ്ചായത്തിനെ പ്രഖ്യാപിക്കുന്നതിനുള്ള മുന്നൊരുക്കമായിട്ടാണ് ഈ പ്രവർത്തനങ്ങൾ സംഘടിപ്പിക്കുന്നത്.
പഞ്ചായത്ത് വൈസ് പ്രസിഡന്റ് രതി ഗോപി, ക്ഷേമകാര്യ സമിതി ചെയർമാൻ സരിത സുരേഷ്, ആരോഗ്യ വിദ്യഭ്യാസ സ്റ്റാൻ്റിംഗ് കമ്മിറ്റി ചെയർമാൻ കെ യു വിജയൻ, ഭരണസമിതി അംഗം തോമസ് തൊകലത്ത്, പുല്ലൂർ സഹകരണ ബാങ്ക് പ്രസിഡൻ്റ് കെ.വി ചന്ദ്രൻ, സെക്രട്ടറി ഇൻ ചാർജ് പി.ബി ജോഷി എന്നിവർ സംസാരിച്ചു.
