സമ്പൂർണ്ണ തരിശ് രഹിത പഞ്ചായത്താകാനുള്ള തയ്യാറെടുപ്പിലാണ് മുരിയാട് ഗ്രാമപഞ്ചായത്ത്. തരിശുരഹിത പഞ്ചായത്തിനായുള്ള പ്രവർത്തനങ്ങൾക്ക് തുടക്കം കുറിച്ചുകൊണ്ട് സംഘാടകസമിതി രൂപീകരിച്ചു. സംഘാടകസമിതി രൂപീകരണ യോഗം ജില്ലാ പഞ്ചായത്ത് വൈസ് പ്രസിഡന്റ് ലത ചന്ദ്രൻ ഉദ്ഘാടനം ചെയ്തു. മുരിയാട് ഗ്രാമപഞ്ചായത്ത് പ്രസിഡണ്ട് ജോസ് ജെ. ചിറ്റിലപ്പിള്ളി അധ്യക്ഷത വഹിച്ചു. ജില്ലാ പഞ്ചായത്തംഗം കെ.വി സജു വിഷയാവതരണം നടത്തി.
കൃഷിവകുപ്പ്, ക്ഷീരസംരക്ഷണ വകുപ്പ്, ജലസേചന വകുപ്പ്, കാർഷിക സർവകലാശാല തുടങ്ങിയ സംവിധാനങ്ങളെല്ലാം ഏകോപിപ്പിച്ച് നെല്ല്, പച്ചക്കറി, ഫലവൃക്ഷങ്ങൾ മത്സ്യകൃഷി, ഔഷധസസ്യം, മൃഗസംരക്ഷണം എന്നീ മേഖലകളിലെ സാധ്യതകളെ പരമാവധി പ്രയോജനപ്പെടുത്തി തരിശ് കിടക്കുന്ന സ്ഥലങ്ങൾക്ക് പുതുജീവൻ നൽകാനാണ് പദ്ധതിയിലൂടെ ലക്ഷ്യമിടുന്നത്.
ജോസ് ജെ. ചിറ്റിലപ്പിള്ളി ചെയർമാനും അഡ്വ. മനോഹരൻ കൺവീനറും റിട്ട. കൃഷി ഓഫീസർ പി.ആർ ബാലൻ കോ- ഓർഡിനേറ്ററുമായുള്ള സംഘാടകസമിതിയാണ് രൂപീകരിച്ചത്.
ബ്ലോക്ക് പഞ്ചായത്ത് പ്രസിഡന്റ് ലളിതാ ബാലൻ, ടി.ജി ശങ്കരനാരായണൻ, ജസ്റ്റിൻ ജോർജ്ജ്, എഡിഎ മിനി എസ്, സിഡിഎസ് ചെയർപേഴ്സൺ സുനിതാ രവി, പഞ്ചായത്ത് വൈസ് പ്രസിഡന്റ് രതി ഗോപി, ആരോഗ്യ സ്റ്റാൻഡിങ് കമ്മറ്റി ചെയർമാൻ കെ.യു വിജയൻ തുടങ്ങിയവർ സംസാരിച്ചു.
