തളിക്കുളം ഗ്രാമപഞ്ചായത്ത് 2024-25 ജനകീയാസൂത്രണ പദ്ധതിയുടെ ഭാഗമായി പായം പദ്ധതിയുടേയും, അങ്കണവാടികൾക്ക് എ.സി. സ്ഥാപിക്കുന്ന പദ്ധതിയുടെയും ഉദ്ഘാടനവും അങ്കണവാടി കുട്ടികൾക്ക് ആദരവും സംഘടിപ്പിച്ചു. തളിക്കുളം ബ്ലോക്ക് പഞ്ചായത്ത് പ്രസിഡന്റ് കെ.സി. പ്രസാദ് ഉദ്ഘാടനം ചെയ്തു. തളിക്കുളം ഗ്രാമപഞ്ചായത്ത് പ്രസിഡന്റ് പി.ഐ സജിത അധ്യക്ഷത വഹിച്ചു.
അഞ്ച് അങ്കണവാടികളിലെ ചായം പദ്ധതിക്കായി അഞ്ച് ലക്ഷം രൂപയും, ഏഴ് അങ്കണവാടികളിൽ എ.സി. വയ്ക്കുന്നതിന് മൂന്നര ലക്ഷം രൂപയുമാണ് ചെലവഴിക്കുന്നത്. അങ്കണവാടി ചുമരുകളിൽ ആകർഷകമായ ചിത്രങ്ങളും കുട്ടികൾക്കായുള്ള ഫർണിച്ചറുകളും കുട്ടികൾക്ക് അപകടം ഉണ്ടാകാത്ത രീതിയിൽ ഫ്ളോറിങ്ങും സജ്ജീകരിച്ചാണ് ചായം പദ്ധതി നടപ്പാക്കുന്നത്.
തളിക്കുളം ഗ്രാമപഞ്ചായത്ത് വൈസ് പ്രസിഡൻ്റ് പി.കെ. അനിത ടീച്ചർ, സ്റ്റാന്റിങ് കമ്മിറ്റി ചെയർപേഴ്സൺമാരായ ബുഷറ അബ്ദുൾ നാസർ, സന്ധ്യ മനോഹരൻ, ഗ്രാമപഞ്ചായത്തംഗവും അങ്കണവാടി അധ്യാപികയുമായ സുമന ജോഷി, അങ്കണവാടി മോണിറ്ററിങ് കമ്മിറ്റി അംഗം ലതിക ടീച്ചർ, ഐ.സി.ഡി.എസ്. സൂപ്പർവൈസർ കെ.എസ്. സിനി തുടങ്ങിയവർ സംസാരിച്ചു.
